ለቤተሰቡ የማያስብ ሰው ከማያምን ሰው ይልቅ የከፋ የሚሆነው እንዴት ነው (1ኛ ጢሞቴዎስ 5:8)?

መጽሐፍ ቅዱስ ስለ ቤተሰብ ሀላፊነት ሲያስተምር፡ "ነገር ግን ለእርሱ ስለ ሆኑት ይልቁንም ስለ ቤተ ሰዎቹ የማያስብ ማንም ቢሆን፥ ሃይማኖቱን የካደ ከማያምንም ሰው ይልቅ የሚከፋ ነው" ይላል (1ኛ ጢሞቴዎስ 5:8)። ማሰብ ማለት አስቀድሞ ማቀድና ማቅረብ ማለት ነው።

በመጀመሪያው ክፍለ ዘመን የነበረው ማህበረሰብ መንግስታዊ የሆነ የጡረታ ወይም የማህበራዊ ዋስትና ስርአት አልነበረውም። ስለዚህ አረጋውያን፣ መበለቶችና አቅም የሌላቸው የቤተሰብ አባላት ሙሉ በሙሉ ጥገኛ የሚሆኑት በዘመዶቻቸው ላይ ነበር።

የእግዚአብሔር ቃል አጥብቆ የሚኮንነው ይህንን ተፈጥሯዊ ሀላፊነት የሚሽሹ ሰዎችን ነው። እግዚአብሔርን የማያውቁ አህዛብ እንኳ በውስጣቸው ባለው ህሊናዊ ህግ ለቤተሰባቸው ስለሚያስቡ፣ አማኝ ነኝ የሚል ሰው ይህንን ሲተው ከተራው አለም የከፋ ይሆናል።

ክርስትና በቃል የሚነገር ብቻ ሳይሆን በተግባር የሚገለፅ እምነት ነው። ለወላጆችና ለቤተሰብ አለማሰብ ፍቅርንና ምህረትን የሚያስተምረውን ወንጌል በተግባር መካድ ነው (ያዕቆብ 2:15-17)። እውነተኛ መንፈሳዊነት ከቤት ይጀምራል።

ቃሉ ለእኛም በቤተ ክርስቲያን ከምናደርገው አገልግሎት ባልተናነሰ መልኩ ለቤተሰባችንና ለወላጆቻችን እንክብካቤ ማድረግ መንፈሳዊ ግዴታችን እንደሆነ ያስገነዝበናል። የቤት ስራውን ያልሰራ የውጭውን ሊያፀና አይችልም።

ስለዚህ ሀብትና ጉልበት እያለን የተቸገሩ ወገኖቻችንን ቸል ብንል የእግዚአብሔር ፍቅር በእኛ ውስጥ የለም። በስራና በእውነት እንጂ በቃልና በአንደበት ብቻ መዋደድ የለብንም (1ኛ ዮሐንስ 3:17-18)።